बुक डेमै युनिफर्म वितरण गरिने

केवल किताब मात्र होइन यसपल्ट बुक डेमा विद्यार्थीहरूलाई युनिफर्म पनि वितरण गरिनेछ। शिक्षा विभागले यस्तै योजना बनाएको छ। विद्यालयहरूले 30 नोभेम्बरभित्र विद्यार्थीहरूको युनिफर्मको माप लिने कार्य पूरा गरून् भन्ने उद्देश्यमा जिल्ला विद्यालय निरीक्षकहरूलाई यस सम्बन्धी निर्देशन पठाइएको छ। दक्षिण शान्तिनगर हिन्दी प्राथमिक विद्यालयका प्रधानाध्यापक चित्तरञ्जन सरकारले भने, शनिवार यस विषयमा विद्यालय निरीक्षकहरूसित प्रधान अध्यापकहरूको छलफल भएको थियो। छलफलमा हामीलाई बताइएको छ कि सेल्फ हेल्प ग्रुपहरूले 30 नोभेम्बरभित्र यो कार्य पूरा गर्ने सुनिश्चित गर्नुपर्छ।

आठौँ कक्षासम्म विद्यार्थीहरूलाई सरकारी युनिफर्म प्रदान गरिन्छ। अघिल्ला वर्षहरूमा शैक्षिक वर्ष आरम्भ भएको केही महीनापछि मात्र विद्यार्थीहरूलाई युनिफर्म वितरण गरिन्थ्यो। तर यस वर्षदेखि शैक्षिक वर्षको पहिलो दिनमै अर्थात् 2 जनवरीको दिन विद्यार्थीहरूलाई नयाँ युनिफर्म प्रदान गरिनेछ। यसका लागि सेल्फ हेल्प ग्रुपहरूलाई पनि छिट्टै कार्य आरम्भ गर्ने निर्देश दिइएको छ। नवग्राम प्राथमिक विद्यालयका प्रधान अध्यापक किरणमय हाजराले भने, विद्यार्थीहरूलाई दुई सेट युनिफर्म दिइन्छ। यो वर्ष युनिफर्मको माप गर्ने काम 30 नोभेम्बरभित्रै पूरा गर्न निर्देश छ।